काठमाडौं : नेपाली सेनाको छाउनी अस्पताल र बलम्बुस्थित सशस्त्र प्रहरी बलको अस्पताल कोरोना भाइरस संक्रमित बिरामी राख्नका लागि तयार भएका छन्।
मंगलबार स्वास्थ्य तथा जनसंख्या मन्त्रालयले पत्रकार सम्मेलनमार्फत् सेना र सशस्त्र प्रहरीका दुवै अस्पताल बिरामी राख्न तयार भएको जानकारी दिएको छ। दुवै अस्पतालमा १ सयभन्दा बढी बेड र ६ वटा सघन उपचार कक्ष (आएसीयु बेड) पूर्ण तयारी अवस्थामा रहेको मन्त्रालयका प्रवक्ता डा. विकास देवकोटाले जानकारी दिए।
साथै, डा.देवकोटाले पछिल्लो २४ घण्टामा संकलन गरिएका स्वाब नमुना परीक्षण गर्दा ५ सय ७० जनाको रिपोर्ट नेगेटिभ आएको बताए। बुधबारसम्म २ हजार ३ सय ६६ वटा परीक्षण भएका छन्। उपत्यकामा १ हजार ९ सय ६५ वटा र उपत्यकाबाहिर ४ सय १ जनामा परीक्षण गरिएको उनले बताए। मंगलबारसम्म १ हजार ७ सय ९६ जनाको परीक्षण गरिएको थियो।
सरकारले हालसम्म कैलाली र कञ्चनपुरबाट मात्रै १ सय ९८ जनाको र्यापिड किट र स्वाबको नमुना संकलन गरी सकेको छ। अछाम, जुम्ला र सुर्खेतलगायतका जिल्लाबाट ८ सय २ वटा नमुना संकलन गरिएको डा. देवकोटाले बताए।
दिपायलमा बुधबार ३ सयभन्दा बढी नमुना संकलन गर्ने उद्देश्यका साथ टोली परिचालन गरिएको छ। उपत्यकामा १२ र उपत्यका बाहिर १ सय २२ गरी बुधबारसम्म १ सय ३४ जना आइसोलेसनमा रहेका छन्। ८ हजार ५ सय ८० जना क्वारेन्टाइन्मा रहेका छन्।
नेपालमा अहिलेसम्म ९ जनामा कोरोनाको संक्रमण देखिएको छ, जसमध्ये १ जना उपचारपछि निको भएर घर फर्किएका छन्। ८ जना उपचाररत छन्। उपचारतका परिवार तथा सम्पर्कमा आएका व्यक्तिहरुलाई कन्ट्याक्ट ट्रेसिङको काम सकिएको मन्त्रालयले जनाएको छ।